Rajasthan Trip Part 2

#രാജസ്ഥാൻ_ട്രിപ്പ് _2017_പാർട്ട്_2

https://m.facebook.com/groups/785863974804742?view=permalink&id=1587140681343730'     #പാർട്ട്_1

*ചമ്പൽ നദിക്കരയിലെ നാഗസന്യാസിയും, 525 ശിവലിംഗവും*

    രാജസ്ഥാനെ കുറിച്ച് ഓർക്കുമ്പോൾ ഏത് ഒരു ആളിനും മനസ്സിൽ ഓടി എത്തുന്നത് ,മരുഭൂമിയും ,വരൾച്ചയും ,പഴയ കൊട്ടാരങ്ങളും രാജാക്കന്മാരെയും എല്ലാം തന്നെ ആണ് .,
      സാധാര ഒരു നാട്ടും പുറത്ത് കാരന്റെ മനസ്സിലെ രാജസ്ഥാൻ വരണ്ടുണങ്ങിയ ഒരിറ്റു വെള്ളം പോലും ലഭിക്കാത്ത രാജസ്ഥാന്റ ചിത്രമാവും ,,,
 
    ജയ്പൂരും ,അജ്മീറും ,ജോഡ്പൂരും ,പുഷ്ക്കറും എല്ലാം പലരുടെയും യാത്രാനുഭവങ്ങളിലൂടെ നമ്മുടെ മുന്നിൽ സ്ഥിര പരിചയമായ രാജസ്ഥാനിലെ സ്ഥലങ്ങളിൽ ചിലതാണ് ....

       ഞാൻ ഇവിടെ നിങ്ങൾക്ക് പങ്കുവെക്കുന്നത് രാജസ്ഥാനിലെ മൂന്നാമത്തെ വലിയ നഗരവും ,നമ്മുടെ രാജ്യത്തിന്റെ കോച്ചിംങ്ങ് സെന്ററുകളുടെ പറുദ്ദീസയായ കോട്ട ജില്ലയിലെ ചില കാഴച്ചകളും എനിക്കുണ്ടായ അനുഭവങ്ങളുമാണ് .

      കടുത്ത ചൂടും വരണ്ട കാറ്റും പ്രതീക്ഷിച്ച് എത്തിയ എന്നെ തണുത്ത കാറ്റും മഴയും ആയിട്ടാണ് രാജസ്ഥാൻ വരവേറ്റത് ,.
          റോഡിലേക്ക് ഇറങ്ങി എന്റെ കണ്ണുകാർക്ക് പുതിയ കാഴ്ച്ചകൾ ആണ് , കേരളത്തിൽ നിന്ന് വിഭിന്നമായ സംസ്കാരവും ജീവിത രീതിയും ആളുകളും , മഴ ശക്തിയായ് പെയ്തു തകർക്കുന്നുണ്ട് ,പലരുടെയും കൈയിൽ കുടയില്ല ,ബൈക്ക് യാത്രികരിൽ ഭൂരിപക്ഷം ആളുകളും മഴ നനഞ്ഞു തന്നെ പോവുന്നു , ഇത്രയും കാഴ്ച്ചകളിലൂടെ തന്നെ കാര്യം പിടികിട്ടി ഈ വർഷത്തെ ആദ്യത്തെ മഴയാണ് പെയ്തു കൊണ്ടിരിക്കുന്നത് .
 
      ഓടകൾ പലതും നിറഞ്ഞു ഒഴുകുന്നു ,ഓടകളിൽ നിന്നുള്ള മാലിന്യം റോഡിൽ പരന്ന് ഒഴുകുന്നുണ്ട് ,ഈ വെള്ളം കാലിലാകാതിരിക്കാൻ ഒരു വിധം കഷ്ടപ്പെട്ടാണ് എന്റെ നടത്തം  ..

     മഴ ശക്തമായി തുടരുകയാണ് ,സൂര്യൻ പതിയേ രാത്രിയുടെ ഇരുട്ടിന് വഴിമാറി നൽക്കുന്നു ,.  
       നഗരത്തിലൂടെ ഒരോട്ട പ്രതിക്ഷണം വച്ച് ഞാൻ റൂമിലേക്ക് തിരിച്ചു ..
നാളെ മുതൽ കുറച്ച് ദിവസങ്ങൾ കാണേണ്ട കാഴ്ച്ചകളെ കുറിച്ച് ആകാംശയുടെ ഒരു താജ്മഹൽ തന്നെ എന്റെ മനസ്സിൽ ഉണ്ട്  , സ്വപ്നങ്ങളിൽ രാജസ്ഥാനും കൊട്ടാരങ്ങളും രാജാക്കന്മാരും തന്നെ ,രാജകീയമായ സ്വപ്നലോകത്ത് മതിമറന്ന് സുഖ നിദ്ര .'
     
         അതി രാവിലെ തന്നെ ഉണർന്നു ,പുറത്തേക്ക് ഇറങ്ങി ,റോഡിലൂടെ നടത്തം തുടങ്ങി ,റോഡിന് ഇരു വശവും പഴയ രാജഭരണ കാലത്തെ നിർമ്മിതികൾ കാണാം ,
ഒരു കാലത്തിന്റെ സംസ്കാരവും സമ്പത്ത് വ്യവസ്ഥയും  അടയാളപ്പെടുത്തിയ നിർമ്മിതികൾ , ഓരോ കാഴ്ച്ചകളും പഴയ  രാജഭരണ കാലത്തേക്ക് കാഴ്ച്ചക്കാരനെ കൊണ്ട് എത്തിക്കും , എവിടെ നോക്കിയാലും ഒന്നോ രണ്ടോ കോട്ടകളും സ്തൂപങ്ങളും കാണാം.

ചില " കൊട്ടാരങ്ങളുടെ ഭാഗങ്ങൾ അടങ്ങിയ സ്ഥലം പഴയ രാജാക്കന്മാരുടെ പുതിയ തലമുറയിൽ ഉള്ളവരുടെ കൈയിലാണ് ...
   
  മറ്റൊരു കൗതുകമായി തോന്നിയ കാര്യം ഇന്നും പല ഗവൺമെന്റ് സ്ഥാപനങ്ങളും പഴയ കാലത്ത് രാജാക്കന്മാർ നിർമ്മിച്ച കെട്ടിടങ്ങളിലാണ് ,.

       
      നഗരമദ്ധ്യത്തിൽ ഒട്ടനവധി ഉദ്വാനങ്ങളും കുട്ടികളുടെ പാർക്കും എല്ലാം .ഇതും പഴയ കാല രാജാക്കന്മാരുടെ സംഭാവന തന്നെ ,ഇന്ന് അതിന്റെ എല്ലാം മേൽനോട്ടം നഗരസഭ വളരെ ഭംഗിയായി നിർവഹിക്കുന്നുണ്ട് ,അത്രയ്ക്കും സുന്ദരമാണ് ഓരോ പാർക്കുകളും ...

      ഒന്ന് റോഡ് അരികിലൂടെ നടന്ന് പോയാൽ നമ്മളെ സ്നേഹിക്കാൻ ഓട്ടോ ചേട്ടന്മാർ ഓടി വരും ,സവാരി തുടങ്ങുന്നതിന് മുമ്പ് കൂലി പറഞ്ഞ് ഉറപ്പിച്ചില്ലെങ്കിൽ ഇവന്മാർ നമ്മുടെ കൈഴുത്തിൽ കത്തിവെക്കും എന്നത് ഉറപ്പാണ് ,.
       
      ഓട്ടോ യിൽ കയറി നേരെ പോയത് ഇന്ദ്രാ മാർക്കറ്റിലേക്ക് ആയിരുന്നു ,നമ്മുടെ കോഴിക്കോട് മിഠായി തെരുവിനെ മറ്റൊരു വലിയ പതിപ്പ് ,വലുതാണെങ്കിലും വൃത്തി അത്ര തന്നെ ഇല്ല ട്ടോ ...   -  ഉപ്പ് മുതൽ കർപ്പൂരം വരെ ഇതിനുള്ളിൽ കിട്ടും ,സാധനം വില പേശി വാങ്ങണം അതാണ് ഇവിടുത്തെ സ്റ്റൈയിൽ ,,,

       രാജസ്ഥാന്റെ ഒരു     വലിയ ഭാഗം കാർഷികമായും ഹരിതാഭമായും സമ്പന്നമാക്കുന്നതിന്റെ വലിയ പങ്ക് വഹിക്കുന്ന നദിയാണ് ചമ്പൽ നദി .,
രാജസ്ഥാനിലെ പ്രധാന നദികളിൽ ഒന്ന് ., കോട്ട നഗരം ചമ്പൽ തീരത്താണ് ,അത് കൊണ്ട് തന്നെ ജലക്ഷാമം മറ്റ് സ്ഥലങ്ങളിൽ ഉള്ള ത്ര ഇവിടെ ഇല്ല , ചുറ്റിലും മരങ്ങളും പച്ചപ്പും ,, ഗ്രാമങ്ങളിൽ കൃഷിക്കും ചമ്പൽ ഉള്ളത് കൊണ്ട് ഒരു ബുദ്ധിമുട്ടും ഇല്ല .,

         ഇന്ദ്രാ മാർക്കറ്റിൽ കയറി എല്ലാം ഒന്ന് വീക്ഷിച്ചു ,സാധങ്ങൾ പലതിനും നമ്മുടെ നാട്ടിലേതിന് വില കുറവുണ്ട് ., പ്രത്യേകിച്ച് തുണി തരങ്ങൾക്ക് ,

      പച്ചകറികൾ പലതിനും കേരളത്തിൽ ലഭിക്കുന്നതിനും എത്രയോ ലാഭം ,കാരണം എന്തെന്നാൽ ഇവിടുത്തെ കച്ചവടക്കാർ പലരും കർഷകരും ,അല്ലാത്ത കച്ചവടക്കാർ കർഷകരിൽ നിന്ന് നേരിട്ട് പച്ചക്കറികൾ വാങ്ങി കച്ചവടം നടത്തുന്നവരും ആണ് ,ഇവിടെ ഇടനിലക്കാരുടെ സ്ഥാനം പിടിക്ക് പുറത്ത് ...

        ഇന്നലെ പെയ്ത മഴയിൽ പച്ചക്കറി മാർക്കറ്റ് അപ്പാടെ ചളിയും മഴവെള്ളവും ആണ് ..,   കുറച്ച് ഫോട്ടോകൾ എടുത്ത് അവിടുന്ന് നേരെ പുറത്തേക്ക് ഇറങ്ങി ...

        ഇന്ന് മഴക്ക് അൽപ്പം ശമനം ഉണ്ട് ,രാവിലെ ചെറിയ മഴ ഒഴിച്ചാൽ പിന്നീട് സൂര്യൻ ഉച്ചിയിൽ എത്തിയത് മുതൽ ചൂടും കൂടി കൂടി വരുന്നുണ്ട് ,,
   
       ഈ പകൽ ചൂടിൽ ഇങ്ങനെ അലഞ്ഞു കറങ്ങി നടന്നാൽ തളർന്ന് അവശനാവും ,കുട ചൂടിയിട്ടു പോലും ഒരു കാര്യവും ഇല്ല ., ഇന്നലെ മുഴുവൻ മഴ ലഭിച്ചിട്ടും ഇന്ന് ഇത്ര ചൂട് എന്നത് നമ്മൾ മലയാളികൾക്ക് ഒട്ടും പൊരുത്തപെടാൻ പ്രയാസമുള്ള പ്രകൃതിയുടെ മറ്റൊരു മുഖമാണ് ...

           രാജസ്ഥാനിലും മറ്റ് ചില ഉത്തരേന്ത്യൻ സംസ്ഥാനങ്ങളിലേയും ഗതാഗത സംസ്കാരം എടുത്ത് പറയണ്ട ഒന്നാണ് ,എന്താന്ന് വച്ചാൽ ഒട്ടും സുഖകരമല്ലാത്ത ഒന്നാണ് ഇവിടം ങ്ങളിലെ ആളുകൾ വാഹനങ്ങൾ കൈകാര്യം ചെയ്യുന്ന രീതി ,ഒട്ടും ശ്രദ്ധ ഇല്ലാതെ അലക്ഷ്യമായിട്ട് ഉള്ള ഉപയോഗം .

          വൺവേ നിയമം തെറ്റിച്ച് വരുന്ന വാഹനങ്ങളും , മിക്ക ബൈക്കുകളിലും മൂന്നിൽ  ൽ കുറയാതെ ഉള്ള ആളുകൾ . ,
      റോഡുകളിൽ ദുസഹമായി എനിക്ക് തോന്നിയ രണ്ട് കാര്യങ്ങളാണ് ,ഒന്ന് ഹോർൺ മുഴക്കി ഉള്ള വണ്ടികളുടെ മരണപാച്ചിൽ ,മറ്റൊന്ന് റോഡുകൾ തങ്ങളുടെ വരുതിയിൽ ആക്കുന്ന പശുക്കളും ,പോത്തുകളും ,എരുമകളും ,.
   
           അവിടെ കണ്ട ഏറ്റവും ദയനീയ കാഴ്ച്ചകളിൽ ഒന്നാണ് റോഡിലൂടെ അലഞ്ഞു നടക്കുന്ന കന്നുകാലികൾ ചപ്പുചവറുകൾക്ക് ഉള്ളിൽ നിന്ന് പ്ലാസ്റ്റിക്ക് കവറുകൾ ഭക്ഷിക്കുന്നത് ,

            നഗരകാഴ്ച്ചകൾക്ക് ഇടയിലാണ് ഞാൻ ആ കാഴ്ച്ച കാണുന്നത് ,കണ്ട മാത്രയിൽ അത്ഭുതത്തോടെ അടുത്തേക്ക് ചെന്നു ,    
   എന്താണ് എന്നല്ലെ ?

    ഒരു ഓട്ടോറിക്ഷ ,  

ഒരു ഓട്ടോറിക്ഷയിൽ എന്താണെന്ന് അല്ലെ നിങ്ങൾ ചിന്തിക്കുന്നത് , കാര്യമുണ്ട് ,.
 
 ഇത് ഒര് ഒന്നോന്നര റിക്ഷ തന്നെ ,   പുരാവസ്തു ഗവേഷകർ കണ്ടാൽ സാധനം അവർ അങ്ങ് കൊണ്ടു പോവും ,

പുറകിൽ നിന്ന് നോക്കിയാൽ നമ്മുടെ നാട്ടിൽ എല്ലാം ഉണ്ടായിരുന്ന പെട്ടിഓട്ടോറിക്ഷ , മുമ്പിലെ കാഴ്ച്ചയാണ് കാഴ്ച്ച ,ഒരു കഴുകന്റെ അല്ലെങ്കിൽ ഒരു രാക്ഷസന്റെ മുഖം പോലെ എനിക്ക് തോന്നിയത് ,എല്ലാം തുരുമ്പ് വന്ന് ദ്രവിച്ചിട്ടുണ്ട് ,നമ്പർ പ്ലയ്റ്റും ഇല്ല ,എന്നിട്ടും ഇതിവിടെ ടിക്സി ആയി ഓടുന്നത് അത്ഭുതമാണ് ,

     എന്നെ കണ്ടതും ഒരു ഇരയെ കണ്ട പുലിയെ പോലെ ഒരാൾ വണ്ടിക്ക് ഉള്ളിൽ നിന്ന് പുറത്ത് ഇറങ്ങി അടുത്തുവന്നു ,
   
       പാൻ മസാല തിന്നു കറപിടിച്ച പല്ലു കാണിച്ചു ചിരിച്ചു കൊണ്ടാണ് വരവ് ,ആദ്യം വണ്ടിയിൽ ചുണ്ടി കാണിച്ചു എന്തോ കാര്യങ്ങൾ പറയുന്നുണ്ട് ,ഒന്നും മനസിലാവാതെ ഞാനും അദ്ദേഹത്തിന്റെ മുഖത്ത് നോക്കി നിന്നു ,, ഒടുവിൽ ചോദിച്ച കാര്യം മനസിലായി  , നിങ്ങൾക്ക് എവിടാ പോവണ്ടത് എന്നാണ് ചോദ്യം .
          എത്ര ശ്രമിച്ചിട്ടും ഒഴിഞ്ഞു മാറാൻ കഴിയുന്നില്ല ,എന്നെ വിടുന്ന മട്ടില്ല ,
       അതിനിടയിൽ രാക്ഷസ റിക്ഷയുടെ ഒന്ന് രണ്ട് ഫോട്ടോസ് അങ്ങ് എടുത്തിരുന്നു ..

         അയാൾടെ നിർബന്ധത്തിൽ വഴങ്ങി മനസില്ലാ മനസോടെ  നാല്പതു രൂപക്ക് റൂമ് വരെ സവാരിക്ക് ധാരണയായി ,,,,

           കുഴികൾ മാത്രമുള്ള റോഡുകളിലൂടെ രാക്ഷസന്റെ ഉള്ളിലെ സവാരി ഒരു സാഹസികത തന്നെ ആയിരുന്നു , സവാരിക്ക് ശേഷം ഒരു കൊട്ടൻ ചുക്കാതി തൈലം കിട്ടിയാൽ ഉഷാർ ആയേനെ , 40 രൂപ നൽകി രാക്ഷസനെ യാത്രയാക്കി നേറെ റൂമിൽ കയറി ഒരു കുളി പാസാക്കി ,

        വൈകുന്നേരങ്ങളിൽ ഇവിടുത്തെ ആകാശത്തിന്റെ ഭംഗി എടുത്ത് പറയണ്ട ഒന്നാണ് ,ചിത്രകാരന്മാരുടെ കാൻവാസുകളിൽ മാത്രം കണ്ട് പരിചയമുള്ള കാഴ്ച്ച എന്റെ കൺമുന്നിൽ ,

     ആകാശത്തിലേക്കും നോക്കി കൂടണയാൻ പാറി പറക്കുന്ന പറവകളെയും കണ്ട് യേശുദാസിന്റെയും ജയചന്ദ്രന്റെയും ചിത്രയുടെയും എല്ല മെലഡികൾ കേട്ട് ഇങ്ങ് ഹിന്ദി നാട്ടിൽ ഇരിക്കുവാൻ വല്ലാത്ത ഒരു ആനന്ദം ..

            ' രാത്രിക്ക് ഒരൽപ്പം നീളം കുറഞ്ഞ പോലെ ,ഉറങ്ങിയിട്ടും ഉറങ്ങിയിട്ടും തീരുന്നില്ല  ,സ്വപ്നങ്ങൾ കൂടുതൽ കണ്ടത് കൊണ്ടാവാം ഇങ്ങനെ ഒരു തോന്നൽ ,
         ഇന്നലെ പകൽ മുഴുവൻ വെയിൽ കൊണ്ടാണ് നടന്നത് അതിന്റെയും ചെറിയ ഒരു ക്ഷീണം ഉണ്ട് ,

         ഇന്നത്തെ പ്രധാന ലക്ഷ്യം ഒരു ശിവക്ഷേത്രമാണ് ,താമസ സ്ഥലത്ത് നിന്ന് ഒരു 3 കിലോമീറ്റർ ദൂരം ഓട്ടോറിക്ഷയിൽ ബോർഗഡ എന്ന സ്ഥലത്ത് വരെ , ശേഷം അവിടെ നിന്ന് '3 കിലോമീറ്റർ ഒരു കനാൽ റോഡിലൂടെയും നടക്കണം ക്ഷേത്രത്തിൽ എത്താൻ ,
          കനാൽ റോഡിലൂടെ ഉള്ള നടത്തം ശരിക്കും എനിക്ക് മറ്റൊരു അനുഭവമായിരുന്നു , ഒരു ഗ്രാമത്തിലൂടെള്ള വഴി ,റോഡിനും കനാലിനും ഇരുവശവും ചെറിയ വീടുകളും വീടിനു ചുറ്റിലും കൃഷി ഇടവും ,
      പോവുന്ന വഴിയിൽ ഒരു ഗവൺമെന്റ് സ്ക്കൂൾ കാണാൻ ഇടയായി ,വലിയ സ്ക്കൂൾ പക്ഷേ കുട്ടികൾ ഒരുപാട് ഒന്നും ഇല്ല , ദളിതരും പാവപ്പെട്ടവരും ആയിട്ടുള്ള കുട്ടികൾക്ക് പഠനത്തേക്കാൾ ഉപരി ഒരു നേരത്തെ ഭക്ഷണമാണ് സ്ക്കൂളിൽ വരുന്നതിന്റെ പ്രധാന ഉദ്ദേശ്യം ,
          പാറി പറക്കുന്ന ചെമ്പൻ മുടിയും ,ചുക്കിചുളിഞ്ഞ യൂണിഫോം ,കൈയിൽ ഒരു പ്ലാസ്റ്റിക്ക് കവറിൽ കുറച്ച് പുസ്തകങ്ങളും ആയിട്ട് നഗ്നപാദത്തിൽ  സ്ക്കൂളിലേക്ക് ഓടുന്ന നാളെയുടെ പ്രതീക്ഷകൾ ,.
            നമ്മുടെ നാട്ടിൽ തെരുവു നായയുടെ ശല്യവും ,നായയുടെ ആക്രമത്തിൽ ആളുകൾ മരണപ്പെട്ടതും ആയ വാർത്തകൾ ഫോണിൽ കാണുന്നുണ്ട് ,

        ഇവിടെ തെരുവുനായകളെക്കാൾ ശല്യം ആയി എനിക്ക് തോന്നിയത് അലഞ്ഞു നടക്കുന്ന പശുവിനെയും പോത്തിനെയും ,എരുമയെയും എല്ലാം ആണ് ,
    ചില വഴികളിൽ ഇവക്ക് ഇടയിലൂടെ വകഞ്ഞു മാറി നടന്ന് അപ്പുറം എത്തുന്നത് തന്നെ വലിയ പ്രയാസമാണ് ,ചില കാളകളും പശുക്കളും വഴിയാത്രക്കാരെ കുത്തി പരിക്കേൽപ്പിക്കാറും ഉണ്ട് ...

         '  ഈ അലഞ്ഞു നടക്കുന്ന കന്നുകാലികൾക്ക് എല്ലാം ഉടമസ്ഥർ ഉണ്ടേന്നറിഞ്ഞപ്പോൾ ശരിക്കും അത്ഭുതപ്പെട്ടത് , പാലുകറക്കാൻ മാത്രം രാവിലെയും വൈകീട്ടും ഒന്ന് കെട്ടി ഇടും എന്നത് ഒഴിച്ചാൽ ഉടമസ്ഥർ ഇവറ്റകളെ ഒന്ന് തിരിഞ്ഞു നോക്കുക പോലും ഇല്ല , പക്ഷേ എല്ലാ ക്ഷീര കർഷകരും ഇങ്ങനെ അല്ല ,വളരെ കുറച്ച് നല്ല ക്ഷീര കർഷകരും ഉണ്ട് ,കന്നുകാലികളെ വളരെ നന്നായിട്ട് പരിപാലിച്ച് വളർത്തുന്നവർ ,

       പാൽ ,പാൽ ഉത്പന്നങ്ങളും വീടുകളിൽ എത്തിക്കുന്നത് ഒരു രസമുള്ള കാഴ്ച്ച തന്നെയാണ് ,ബൈക്കുകൾക്ക് ഇരു വശവും വലിയ പാൽ നിറച്ച പിച്ചള പാത്രങ്ങൾ തൂക്കി അവരുടെ തനത് വേഷത്തിൽ പാൽ വിൽപ്പന .

         നടന്ന്  കുറച്ച് മുന്നോട്ട് എത്തിയപ്പോൾ റോഡിന് ഇരുവശവും കുറേ ആളുകൾ ഇരിക്കുന്നു ,അവർക്ക് ഇടയിലൂടെ വേണം എനിക്ക് അപ്പുറം എത്താൻ , പാൻ മസാലയും എല്ലാം മുറുക്കി ചുണ്ടു ചുവപ്പിച്ച് പല്ലുകളിൽ നിറയെ മുറുക്കിന്റെ കറ കാണാം , കാറ്റത്ത് പാറി പറക്കുന്ന ചെമ്പൻ മുടികൾ കണ്ടാൽ അറിയാം വെള്ളം കണ്ടിട്ടു തന്നെ ദിവസങ്ങളോ മാസങ്ങളോ ആയിക്കാണും , ഇരിക്കുന്ന കൂട്ടത്തിൽ പുരുഷ്യൻ മാരും സ്ത്രികളും കുട്ടികളും എല്ലാം ഉണ്ട് ,
        അതിരാവിലെ ഇങ്ങനെ അന്യസംസ്ഥാന തൊഴിലാളികൾ ജോലി തേടി പീടിക കോലായിലും റോഡരികിലെ കമാനത്തിലും ഇരിക്കുന്ന കാഴ്ച്ച ഇന്ന് നമ്മുടെ നാട്ടിലും സുലഭമായി കാണാം ,
        ഇവിടെ ഇരിക്കുന്ന ഈ ആൾക്കൂട്ടർക്കും ലക്ഷ്യം അത് തന്നെ ആണ് ,ജോലി .
         ഒരു കുടുംബത്തിലെ ചെറിയ കുട്ടികൾ മുതൽ മുതിർന്നു പ്രായമായവർ വരെ ജോലിക്കു പോവും ,

        ഇന്നും അയിത്തവും ,സവർണ്ണാധിപത്യവും കൊടികുത്തിവാഴുന്ന ഇടമാണ് ഇവിടെ , വിദ്യാഭ്യാസം പോലും ഒരു വിഭാഗം ജനങ്ങൾക്ക് ഇവിടെ അപ്രാപ്യമാണ് ,ചില ആശുപത്രികളിൽ പോലും ജാതിയും മതവും നോക്കി ചികിത്സിക്കുന്ന അവസ്ഥ ,  ബാലാവകാശവും ,വിദ്യാഭ്യാസ അവകാശവും എല്ലാം കടലാസിൽ മാത്രം ,
      കെട്ടിട നിർമ്മാണത്തിൽ ഏർപ്പെടുന്നതും ,ഒരു നഗരത്തിന്റെ മുഴുവൻ മാലിന്യം വഹിക്കുന്ന ഓടകളിൽ കഴുത്തറ്റം വെള്ളത്തിൽ ഇറങ്ങി ഓടവൃത്തി ആക്കുന്ന കുട്ടികളുടെയും എല്ലാം ചിത്രം ഒരു വേദനയോടെ മാത്രമേ ഒർക്കാൻ കഴിയുക ഉള്ളു ,

        നമ്മുടെ കേരളത്തെ പോലെ ഇവിടങ്ങൾ ആവാൻ ഒരുപാട് വർഷങ്ങൾ ഇനിയും വേണ്ടിവരും ,മാത്രമല്ല വിദ്യാഭ്യാസത്തിന്റെ കാര്യത്തിലും സാസ്കാരികമായും ,സവർണ്ണാധിപത്യത്തിന് എതിരെയും എല്ലാം നമ്മുടെ നാട്ടിൽ നടന്നത് പോലുള്ള നവോഥാനം ഇവിടെയും അത്രക്ക് നിർബന്ധമാണ് ,

         '      എന്റെ നടത്തത്തിന് വേഗത കൂട്ടി ,സൂര്യൻ ശക്തി കൂടുന്നതിന് മുമ്പ് ക്ഷേത്രത്തദർശനം കഴിഞ്ഞു തിരികെ എത്തണം ,
 
         എന്റെ യാത്ര മുന്നോട്ടാണെങ്കിലും കാണുന്ന കാഴ്ച്ചകളും അനുഭവങ്ങളും മനസ്സിനെ പിന്നോട്ട് ഓടിക്കുന്ന പോലെ ഒരു തോന്നൽ ,
      ലോകം എത്ര വളർന്നാലും ശാസ്ത്രം എത്ര കുതിച്ചാലും ,ആണ്ടുകൾ എത്ര മുന്നേറിയാലും ,എത്രയോ വർഷം പുറകിൽ ജീവിക്കെണ്ടി വരുന്ന പാവം ചില മനുഷ്യർ ,  വിദ്യാഭ്യാസവും ,നല്ല ജോലിയും ,പണം സമ്പാദിക്കലും ,ഒന്നും ആവില്ല ഇവരുടെ സ്വപ്നങ്ങൾ , മൂന്നു നേരവും നല്ല ഭക്ഷണം കഴിക്കുന്നതും നല്ല സാഹചര്യത്തിൽ ഒന്ന് അന്തി ഉറങ്ങുന്നതും ആയിരിക്കും ഇവരിൽ ഭൂരിപക്ഷത്തിന്റെയും ജീവിതത്തിലെ വലിയ സ്വപ്നം .

        നീണ്ട മൂന്ന് കിലോമീറ്റർ നടത്തം ഒടുവിൽ ക്ഷേത്രത്തിലേക്കുള്ള വലിയ ഗോപുര കമാനം കണ്ടു " ശിവ്പുരി ധാം "

നടന്നു വന്ന മൂന്ന് കിലോമീറ്റർ ചെറിയ ഒരു ദൂരമാണെങ്കിലും എനിക്ക് ഇതിന് വല്ലാത്ത ഒരു ദൈർഘ്യം അനുഭവപ്പെട്ടു ,

       ക്ഷേത്ര കവാടത്തിന് ഇരുവശവും പൂക്കളും പൂജാ സാധനങ്ങളും വിൽക്കുന്ന രണ്ട് പെൺകുട്ടികൾ , കുറച്ച് പൂക്കളും ,ഒരു പൂമാലയും വാങ്ങി ഞാൻ അകത്ത് കയറി .,

       ശാന്തമായ അന്തരീക്ഷം ഒരുപാട് മരങ്ങളും ചെടികളും തീർക്കുന്ന തണലും കുളിരും ഏറ്റുവാങ്ങി ക്ഷേത്ര നടയിലേക്ക് നടക്കാം , സൂര്യപ്രകാശം ഒട്ടും തന്നെ താഴെ പതിക്കാത്ത അത്ര തണൽ മരങ്ങൾ നൽകുന്നുണ്ട് , മയിലുകളും ,അണ്ണാരക്കണ്ണന്മാരും ,ഒട്ടും ഭയമില്ലാതെ ഞങ്ങൾക്ക് അടുത്തുകൂടി കറങ്ങി നടക്കുന്നു ,ശാന്തമായ അന്തരീക്ഷത്തിൽ മയിലുകളുടെ കരച്ചിലുകൾക്ക് കുറച്ച് മാധുര്യം ഉള്ളതായി തോന്നി , ഒന്ന് ശ്രദ്ധ തെറ്റിയാൽ നമ്മുടെ കൈകളിലെ സാധനങ്ങൾ കൊള്ളയടിക്കാൻ നല്ല അസ്സൽ രാജസ്ഥാൻ കൊള്ളക്കാരായി വാനരപട തന്നെ നമുക്ക് പിന്നാലെ ഉണ്ട് ,   തീർത്തും പ്രകൃതിയോട് ഒരുപാട് അടുത്ത് നിൽക്കുന്ന ഒരനുഭവം ,മനസ്സും ശരീരവും ഇപ്പോൾ ഒന്ന് ശാന്തമായ പോലെ ,
 
     പുറത്ത് കണ്ട പൈപ്പിൻ ടാപ്പ് തുറന്ന് കാലും കൈകളും മുഖവും എല്ലാം കഴുകി ക്ഷേത്രത്തിനകത്തേക്ക് കയറി .

      ഇത്രയും ദൂരത്തിലുള്ള ഈ ക്ഷേത്രത്തിൽ ഞാൻ വന്നത് എന്താവും എന്നാ ല്ലെ  നിങ്ങൾ ചിന്തിക്കുന്നത് ,കാര്യമുണ്ട് ,ഒരു പ്രത്യേകതയും ഉണ്ട് ,'
            525 ശിവലിംഗങ്ങൾ ! .

ഇന്ത്യയിൽ തന്നെ മറ്റെവിടെയും ,മറ്റൊരു ക്ഷേത്രത്തിലും ദർശിക്കാൻ കഴിയാത്ത കാഴ്ച്ച ,ഒറ്റ ദർശനത്തിൽ 525 ശിവലിംഗങ്ങൾ ,

525 ശിവലിംഗങ്ങൾക്കും ഹിന്ദു മത ആചാര്യപ്രകാരം ഒരു പാട് പ്രത്യേകതകൾ ഉള്ളതായി അവിടുന്ന് അറിഞ്ഞു ,ആധികാരികമായി പറഞ്ഞു തരാൻ അറിയാത്തത് കൊണ്ട് ഞാൻ അതിലേക്ക് കടക്കുന്നില്ല ,

         ഒരു കാര്യം വളരെ വ്യക്തമായി ,525 ശിവലിംഗത്തിലും ജലധാര ചെയ്യാം , ഒരോന്നിലും ധാര ചെയ്യുമ്പോൾ ഈ ലോകത്തിനും ,മനുഷ്യനും മറ്റു ജീവജാലങ്ങൾക്കും നന്മ വരാൻ മാത്രം പ്രാർത്ഥിക്കാൻ അവിടെ കണ്ട ഒരു സന്യാസി ശ്രേഷ്ഠൻ ഉപദേശിച്ചു ,

       എനിക്ക് തോന്നിയത് ഇത്രയും ശിവലിംഗത്തിൽ ധാരചെയ്യുമ്പോൾ കുറഞ്ഞത് ഒരു പതിനഞ്ച് മിനിട്ടോളം സമയം വേണം ,ഇത്രയും സമയം നമ്മുടെ ശരീരവും മനസ്സും ഏകാഗ്രതയോടെ മറ്റ് ചിന്തകളിൽ നിന്ന് പുറത്ത് വന്ന് ശാന്തമായ ഒരു അവസ്ഥയിൽ എത്തും ,.

          ധാര യും പ്രാർത്ഥനയും എല്ലാം കഴിഞ്ഞു ക്ഷേത്ര മുറ്റത്തെ ഹോമകുണ്ഡവും ക്ഷേത്ര  ചരിത്ര മടങ്ങിയ ചിത്രങ്ങളും കുറിപ്പുകളും വായിച്ചു അവിടെ നിന്നു ,

          ഈ നിൽപ്പിനു പിന്നിൽ മറ്റോ രു ഉദ്ദേശം ഉണ്ട് ,മനസ്സിൽ ഒരുപാട് കാലമായിട്ട് ഉള്ള ഒരാഗ്രഹം സഫലമാക്കണം .
       ആഗ്രഹം മറ്റോന്നും അല്ല ,നമ്മളെല്ലാം അഘോരികൾ എന്നും നാഗസന്യാസികൾ എന്നും വിളിക്കുന്ന ഒരു സന്യാസി ഈ ക്ഷേത്രത്തിന്റെ ഗുരു സ്ഥാനിയനായിട്ട് ഉണ്ട് ,അദ്ദേഹത്തേ ഒന്ന് കാണണം ,ഒരു ഫോട്ടോ എടുക്കണം .
        ഹാളിനുള്ളിൽ  നിന്ന് ഉച്ചത്തിലുള്ള പ്രാർത്ഥനയും മണിയടി ശബ്ദവും എല്ലാം കേൾക്കുന്നുണ്ട് ,
     ഹാളിന് പുറത്ത്    പുർവ്വികരായ    സന്യാസിമാരുടെ ചിത്രങ്ങൾ കാണാം ,ഒരു ചെറിയ തുണികൊണ്ട് രഹസ്യ ഭാഗം മാത്രം മറച്ചുള്ള താണ് ആകെ പാടെ ഉള്ള വസ്ത്രം എന്ന് പറയുന്നത് ,.

      ഏറെ വൈകാതെ കാത്തിരിപ്പിന് വിരാമമിട്ട്  അകത്ത് നിന്ന് ഒരാജാനഭാഹു പുറത്ത് വരുന്നു ആറ്  ആറര അടി ഉയരം ,നീട്ടി വളർത്തിയ താടിയും മുടിയും , ശരീരമാസകലം ഭസ്മത്തിൽ സ്‌നാനം കഴിച്ചിട്ടുണ്ട് ,
        നേരെ വരുന്നത് ഹോമകുണ്ഡത്തിടുത്തുള്ള കട്ടിലിലേക്ക് വന്നിരുന്നു , ക്ഷേത്രത്തിൽ എത്തിയ ആളുകൾ അദ്ദേഹത്തിന്റെ അടുത്ത് ചെന്ന് അനുഗ്രഹം വാങ്ങുന്നുണ്ട് ,.

        ഒരു വിധം ആളുകൾ എല്ലാം പോയതിന് ശേഷമാണ് ഞാൻ എന്റെ അവസരം ഉപയോഗിച്ചത് ,കൂടെ ഉള്ള സുഹൃത്ത് എന്നെ പരിചയപ്പെടുത്തി ,കേരളത്തിൽ നിന്ന് വന്നതാണ് എന്നറിഞ്ഞപ്പോൾ സന്തോഷം പങ്കുവച്ചു ,  എല്ലാവരോടും സൗമ്യമായും എല്ലാവർക്കും നന്മ നൽക്കി ജീവിക്കാനും ഒരു ഉപദേശവും തന്നു ,

      ഒരു ഫോട്ടോ എടുക്കട്ടെ എന്ന് ചോദിച്ചപ്പോൾ പൂർണ്ണ സമ്മതം ,     പല നാഗസന്യാസികളും മുൻ കോപികളും ദേഷ്യകാരുമായിരിക്കും എന്ന്  കേട്ടറിവുണ്ട് ,പക്ഷേ കേട്ട അറിവിൽ നിന്ന്  പൂർണ്ണമായും വ്യത്യസ്ഥമായിരുന്നു'  ഇദ്ദേഹത്തിന്റെ സമീപനം ,, ശാന്തവും സ്നേഹവും '  നന്മയും നിറഞ്ഞ നല്ല ഒരു മനുഷ്യൻ , (ഒരിക്കലും ഇദ്ദേഹം ഒരു ആൾ ദൈവം അല്ല ട്ടോ ,സന്യാസ ജീവിതം നയിക്കുന്ന ഒരു മനുഷ്യൻ അല്ലെങ്കിൽ ഒരു ഗുരു മാത്രം ) .

        ഒറ്റ ദിവസം മണിക്കൂറുകളുടെ വ്യത്യാസത്തിൽ വ്യത്യസ്ഥ അനുഭവങ്ങൾ ,

     ക്ഷേത്രത്തിനോട് വിട പറഞ്ഞ് തിരിച്ചു ബോർഗഡയിലേക്ക് നടത്തം തുടർന്നു , കനാലിന് അരികു ചേർന്ന് നടത്തം ,കനാലിലേ വെള്ളം വളരെ ദയനിയമാണ് ,മാലിന്യം നിറഞ്ഞ് കറുത്ത ജലം ,നല്ല ഒഴുക്കും ആഴവും ഉണ്ട് ,,, വലിയ കനാലിന്റെ കൈവഴികളായി ചെറിയ കനാലുകൾ ഉണ്ട്  ,ചെറിയ കനാലിനു വശം ചേർന്നു ഉള്ള റോഡിലൂടെ വേണം എനിക്ക് യാത്ര ചെയ്യാൻ ,ചെറിയ കനാലിൽ വെള്ളം തീരെ ഇല്ല ,പക്ഷേ മാലിന്യം നന്നായിട്ട് തന്നെ ഉണ്ട് .

        വേനലിൽ കനാലിൽ ജലം വന്നാൽ കുളിയും അലക്കും എല്ലാം ഇതിൽ തന്നെ ആണേന്ന കാര്യം ഇവിടുത്തക്കാർ മറന്നിരിക്കുന്നു .

         കുറച്ച് മുമ്പോട്ട് നടന്നപ്പോൾ കനാലിൽ  കുറച്ചാളുകൾ വട്ടം കൂടി നിന്ന് കാര്യമായ എന്തോ ചർച്ചയിലാണ് ,കാര്യം എന്താണെന്ന് അറിയാൻ ഒന്ന് എത്തി നോക്കി , ഒരു പശു!

ഒരു പശു ചത്തു കിടക്കുന്നു ,വേഗം ക്യാമറ എടുത്ത് രണ്ട് ഫോട്ടോ എടുത്തു , രാവിലെ വരുമ്പോൾ ഞാനി കാഴ്ച്ച കണ്ടിരുന്നില്ല , കൂടി ഇരിക്കുന്നവർ കാര്യമായ എന്തോ ചർച്ചയിലാണ് , കാര്യം എന്താണെന്ന് അറിയാൻ  കുറച്ച് മാറി നിന്ന് വീക്ഷിച്ചു .!!
കാര്യം എന്താണെന്ന് അറിയാനുള്ള ആകാംശയിലായിരുന്നു ഞാൻ ......!!

എന്തായിരിക്കും ഇവർ പറയുന്നത് ?

ഇവരുടെ ചർച്ച ഒരു കൈകൂലിയും ആയി ബന്ധപ്പെട്ടാണ്,'

പശുവിന്റെ മരണവും കൈക്കൂലിയും തമ്മിൽ എന്ത് ബന്ധം എന്നാവും അല്ലെ ?

പറയാം

പിന്നീട് !
:'

NB : ബാക്കി അടുത്ത  ഭാഗത്തിൽ
      =    കൂടുതൽ ഫോട്ടോകൾ കമന്റ് ബോക്സ്സിൽ    
      :- അഖിൽ കാക്കൂർ'